Chinram Phunsang Fimthiamnak Zalennak

Za Peng Lian

Fimthiamnak Zalennak

Fimthiamnak zalennak kan timi cu Phunsang tlawng pakhatkhat sungih a ummi Cazirhtu pawl, hlaikhlainak a tuahtu pawl le phunsang fimnak a zir rerotu tlawngta pawl hrang ih lo thiehlo ih a tulmi zalennak a si. Cuhleiah Fimthiamnak Zalennak timi cu Saya le Sayama pawl, hliakhlaitu pawl le tlawngta pawl ih zalennak a si lawng silo in Fimthiamnak lam hna a tuantu hmuahhmuah ih neihmi zalennak a si. Curuangah Fimthiamnak zalennak cu zirhnaklam zalennak, zalen zet ih hliakhlainak tuahtheinak, le zalenzet ih zirtheinak pawl an si lawng silo in a tulsammi tlingtlaknak pawl nei in Fimthiamnak rianram sungih nunphum aw in hna a tuanmi zokhal ih neihmi zalennak a si.

Fimthiam zalennak cu Leitlun ramtinkim ih a ummi zokhal ih neihmi canvo pakhat khal a si. Milai canzo pakhat a si ruangah fimthiamnak zalennak cu a zirtu, hlawhtlinnak a cotu zate ih neihmi a si. Fimthiamnak zalennak sung ih a telkhawm thehmi pawl tla cu zalen zet ih zirhtheinak, zalenzet ih hliakhlainak theinak, zalen zet ih suhhlam theinak, zalenzet ih cangantheinak le casuah theinak, fimzirnak phunsang tlawng thawn a pehparmi tuanvo neitu pawl hna an tuanmi tlun ah tlaksamnak pawl zalenzet ih hawl le phorhsuak theinak pawl khal an tel. (J – J Johnstone 2012:4) Fimthiamnak zalennak cun a umciami fimnak, thiamnak pawl le tuanzomi dinhmun pawl tlun ah zalenzet ih suhhlamtheinak, hliakhlaitheinak, zalenzet ih tisin theinak, maih hmuhdan pawl zalenzet ih ngansuah theihnak canvo pawl a kilhimsak a si.

Kan ram sungah zirhtu saya/sayama pawl, hliakhlaitu pawl, ca a zir reromi tlawngta pawl le fimthiamnak lam hna a tuantu pawl in thuneitu pawl hnen ihsin khamnak, hringhronak umlo te’n zalenzet ih ruahtheinak, maih hmuhdan zalenzet ih simphuan theinak, ramkhelthu ah zalenzet ih teltheinak pawl a um ahcun kan ram ah fimthiamnak zalennak a um tiah kan sim thei. (Cheryl Hudson 2016:19).

Chinram sungih Fimthiamnak Zalennak

Chinram sungah phunsang fimthiamnak zalennak ziangtluk a um timi hi Myanmar ram sung ah Fimthiamnak zalennak ziangtluk a um timi tlun ah a hngat aw. A tawinak in

kan sim le Kum 1962, ralkap thuneihnak Uknak thalozet ruangah a siatralmi fimthiamnak zalennak cu tuini tiang felfamkim te’n an rem thei hrihlo timi a fiang. Kum 1962, U Ne Win acozah san ihsin tuini NLD Uknak san tiang ramkhel khawvel ih thathozet le zalen zet ih a teltu Saya le Sayama, tlawngta pawl a thawngtel in kaih le khih an tong rero timi kan hmu thei. Hrem le harsatpeknak dinhmun a tong rero tu Saya le Tlawngta khal ticawk lo in an um. (Censorship News No. 18, 1992) Thuneitu Acozah le an Ukhruainak tlun ah siseh, titheinak a neitu pawl tlun ih fakselnak pawl cu a sualnak tumpi tuah tluk in zoh ringring a silai. Kum 2019 thoktir ihsin June thla tiang Zalenzet ih sim le ngantheihnak Khammi daan an pahbal tin mipum (250) cu kaihkhihnak, thawngthlaknak le cawh kuanternak pawl a um rero lai ti hmuh a theih.

Tuini Myanmar ram ih phunsang fimthiamnak thangso dingzat ih a thanso lonak a san cu University pawl ah mahte zalen zet ih lairel theinak le Ukhruai theinak an neihlo ruangah a si. (Ei Shwe Phyu 2018: The Myanmar Times). Kum 2015 ih an remhngetmi Rampi Fimthiamnak Daan cun phunsang tlawngta pawl le Saya/Sayama pawl hrangah zalennak mallai a pek a bang nan cuih Daan tlun ah Saya/Sayama le Tlawngta pawlkom a tam sawn ih dokalhnak le soilselnak tamzet a um hrih thotho. Cutih ih dokalh a tonnak san cu Phunsang Fimthiam Zirnak le Ukhruaidan kan zohsal tikah Central Ukhruainak System a tamtuk hrih ruangah a si. (Ei Shwe Phyu 2018: The Myanmar Times) Tlunlam Central Ukhruainak System a tumtuk ruangah Phunsang tlawng pawl dinhmun ah an zirzoi dingmi ca thuhla (subject) pawl rem le tuahtha theinak an nei nawnlo. Saya/Sayama thar (asilole) Acozah hnatuantu thar laaknak thu khalah Phunsang Tlawng pawl cu zalenzet ih Lairel theinak an nei lo. Tlawngta pawl in an maih zir duhmi ca thuhla pawl le an kai duhmi tlawng zalenzet ih hriltheinak an nei lo. An zirduhmi le an kai duhnak tlawng pawl cu phunhra camibuai ih hmat ngahmi tam le mal tlun ah a hngat aw. Curuangah tufang ih Phunhra Camibuai a ongtu pawl in Zalenzet ih fimthiam zirtheinak siseh, mai duhmi ca le thuhla zirtheinak pawl le duhmi tlawng hriltheinak an nei nawnlo.

Cumi lawng silo in phunsang tlawngta pawl in tlawnginn hruangkulh sungih zalen zet ih simphuan theinak, a hleice in ramleng thiamsang pawl sawm in ramkhel thuhla simphuannak, tonkhawmnak pawl tuahtheinak an neilo. Phunsang tlawngta pawlkom pawl in tlawnginn hruangkulh sungah Simphuannak, tonkhawmnak pawl tuah an duh tikah rel dingmi thulu, thu le hla, sawmmi pawl ih hmin, an thuhlatawi le sawmmi mipum zate Tlawnginn Uktu professor pawl hnen ah kimten simthan ih siannak dil a tul. Cuih

dan cu Fimthiamnak Ministry kuttang ih Phunsang Fimthiamnak Department ihsin Kum 2018, May 21 ni ih thlun dingdan tiah an khiahmi a si. Hih dinhmun zoh in phunsang tlawngta pawl in Tlawnginn Hruangkulh sungah zalen zet in maih duhmi thulu hril in tonkhawm le relkhawmnak an neihlo zia a langter a si. Cuih dinhmun pawl in a langtermi cu simfiang zomi bangtuk in tuini phunsang tlawng zate cu Rampi acozah ih Ukhruainak le thupeknak tangah ummi an si ruangah phunsang tlawng pawl ah Fimthiamnak Zalennak (asilole) zalen zet ih fimnak zirtheinak a um lonak san a si. Phunsang tlawng pawl ah Rampi Acozah (ahleice in phunsang fimthiamnak Department) in tlunlam (Central) Ukhruaidan an thum thei ih phunsang tlawng pawl ih maih hmakaa mahte sial in Ukhruai awk theinak a um lawngah Kan ram sungah Fimthiamnak Zalennak le zalenzet ih Fimthiamnak zir theinak famkimte’n an co ngah ding a si.

Note: Written by Za Peng Lian, and translated by Thawng Bik

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s