Ciinthlak Tlawng (Lungpi) ih Tlawngta pawl ih hmuhtonmi harsatnak le sawmngiarnak pawl

Mary Kipmen

Hih hliakhlainak cun Chinram Falam khua ih a ummi Ciinthlak Tlawng (Lungpi) ih a kaimi tlawngta pawl ih hmuhtonmi harsatnak, buaibainak le sawmngiarnak pawl zoihnit dingah tumtahnak a nei. Hliakhlainak hrangah a zatsiar (qualitative approach) hman a si ih Saya/ma pawl tel in mipum (20) hnen ah tonsuhnak, phone in suhhlamnak pawl neihmi a si. Hih hmuhtonnak ihsin a tanglam ih thuhla pawl kan hmu thei –

Apakhatnak ah, Ciinthlak Tlawng (Lungpi) ih a kaitu tlawngta pawl in umtlannak thawn pehpar in harsatnak an neihthu hmuhsuak a si. Tlawngta pawl umnak hostel pawl an daihcang awklo hlei ah ihkhun khal an daihcang lo ruangah pakhat it ihkhun pahnih kom tahrat in mi (3) an tawm-awk thu kan hmu thei. Cuhlei ah ihkhun pakhat le pakhat tetsongzet in an ret ruangah thilri dang retnak a umlo thu le milai fehnak khal an harsat thu kan hmu thei. Fumfezet in umnak khaan pawl khiahmi a umlo ruangah pumpak thuhla ah himnak a umlo hlei ah cazohnak khal an remcanglozet timi kan hmu thei.

Apahnihnak ah ei-in thuhla ah harsatnak an neih thu kan hmu. Nikhat ah vei (2) lawng rawl an peek hlei ah, zarhkhat ah vei (3) lawng sa an pe thei timi kan hmu thei. Tonsuhmi tlawngta a tamsawn cun nitin pee le ngapih lawnglawng an pek ruangah an remcanlo zet thu vuihram phah in an sim cio. Cuhlei ah an rawleinak khaan a fiaktuk ih cabuai le tokham khal an daihcang aw lo ruangah hmunkhat ah ei lo in buurkhat hnu buurkhat a sangsangte’n rawl ei a tul thu an sim. Zanlam zanriah khawh ah kumhnihnak le kumthumnak tlawngta pawl lengsuak zirzoinak an neihbet hrih ruangah nawt-aw zet ih rawl ei a tul thu siseh, rawl ei caan khal a tuantuk hrih ruangah zaan cazoh cah ah rilrawng in an um thu le cuih dinhmun pawl ruangah zalenzet ih in – ei a duhtu tlawngta pawl cu a lengah innhlang in an um thu an sim.

Thlun ding daan a khohkhahtuk ruang khalah harsatnak an neih thu kan hmu thei. Tlawnginn Kulh sungah Bike lutsuak sianlonak, lengsuahvah can ah hminkhen a tul ringringnak, le numi pawl zanlam 5:30pm hnu innleng suahvah a ngah nawnlonak pawl ruangah an harsatzet thu kan hmu thei. Cazirhnak lam khal ah harsatnak an neih thu kan hmu thei. Tahthimnak ah – Saya/ma lam lawng in zirhsimnak an nei ih tlawngta lam ihsn ruahrelkhawmnak an neih lo ruangah haratnak an ton thu an sim. Cuhlei ah Textbook Bupi zate khal mirangca lawnglawng ih ngan a si ih Saya/ma pawl cun a let fangfang

lawng an letsak theithu, assignment pek tik khal ah Saya/ma pawl ih an note sung ih ta vial lawng cawn le ngan men a si thu kan hmu thei. Exam an tuah khal ah zohlo ngah dingin cazoh a tul ruangah khalah tlawngta pawl hrangah sawmngiarnak pawl a um thu an sim.

Atak ih tisinnak thawn zir sehla thiam a olzet ko nan cuti ih tuahmi a malzet tiah an sim. Tahthimnak ah tingkung ciin-pehnak thuhla cu a tak in tuahsehla thiam a olzet nan cuvek ih zirnak an tuahlo thu an sim. Cuhlei ah cazirnak khankhat ah mipum (75) lai zirkhawm a si tikah cabuai, tokham pawl daihcang awlo in tokham pakhat ah mi pahnih to tlang ih zir a tul ruangah an harsazet thu an sim. Atamsawn in thingkung cindan vial lawng an zirh ruangah pangpar ciin a huamtu hrangah harsatnak an neih thu an sim. Tlawnginn ah thlaici khal kimte’n a umlo thu an sim. Atak ih lengsuah zirzoinak hrangah thilri tulsamnak an nei hrih ih caan tamsawn cu phaihlai pakhat lawng hman ding an neih thu an sim. “Atak ih tondahlo le hmuhdahlo mi thuhla pawl textbook Bupi sungta lawng in an zir rero” timi hmuh theih a si.

Tong lam khalah harsatnak an tong rero. Cazirhtu a tamsawn cu Kawl an si ruangah Laimi tlawngta pawl hrangah an tong thiamlonak ruangah an zirhmi fianglonak an neih thu kan thei. “Thuhla hrekkhat ahcun an hmanmi tongfang pawl theihlo khal le kan sutsal ngam nawnlo” timi an harsatnak khal kan hmu thei. Hmuhsuahnak a dang pakhat hrih cu tlawngta a tamsawn cu maih duhnak tello in nu le pa, rualpi ih khihhmunnak in tlawngkaimi an si ruangah an zirmi ah lunglut lo in an um ih cumi cu Saya/ma pawl hrang ah sawmngiarnak tumpi pakhat a si timi kan hmu thei.

Thuhla kan khaikhawmsal tikah Ciinthlak Tlawng (Lungpi) ih tlawng a kaitu pawl cu umtlannak, ei le in, thun dingdaan, zirhdan, a takram ih tuahnak lam tlaksamnak le hman ding thilri sambaunak, thlaicii ngahtheilonak le tong lam harsatnak pawl an nei timi kan hmu thei.

Note: Written by Mary Kipmen , and translated by Thawng Bik

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s