Hakha Phunsang Tlawng Pawl Inn-lo le Thilri Dinhmun

Tha Cer Cin

Fimnak le thiamnak kan zir tikah a tulmi inn le lo, a bawmtu thil le ri pawl cu Phunsang tlawng a thanso theinak ding le a tlingtlakmi Fimnak pakhat ngah dingah a thupizet. Chinram ih um University/College pawl in a tulmi inn le lo, a bawmtu thil le ri ziangtluk an nei. Ziangvek dinhmun ah an um timi thusuhnak pawl cu a thupizetmi thusuhnak an si. Curuangah a tui hlaikhlai thusuhnak cu “ Hakha University/College pawl ah a tulmi inn le lo, bawmtu thil le ri ziangtluk famkim in an nei, cuih thil pawl a tlamtlin lo ruangah zirnak ah ziangvek in a khawnghngornak” timi thusuhnak hi a si.

Hih thusuhnak cun thupibik in fimthiamnak zirnak ah a tulmi inn le lo, thil le ri, lehpannak, Calai Buuk le a dang a tulmi pawl ziangtluk an famkim timi pawl a zirzoi. Hih hliakhlainak ih hmuhsuahmi pawl cu a tanglamvek in tarlang a si –

Ahmaisabik in Hakha University/College pawl ah Zirzoinak hrangah a tulmi Khaan, cabuai, tokham pawl cu famkimzet in a um tiah a hmu. Tonsuhmi tlawngta mipum ih zatek (78) cun cazirnak khaan an daihcang awk thu le, zatek (75) pawl cun cabuai, tokham pawl famkimte’n a um thu an sim. Asinan ruahding ummi cu hawiruanlo tlawngta pawl hrangih feh suhsohnak remcang dingin tuahsakmi a um lo thu an simmi hi a si.

Apahnihnak ah Lehpannak hrangah hmunhma pawl an tullai timi kan hmu thei. Tonsuhmi tlawngta pawl ih zatek (79) cun lehpannak hrangah hmunhma a umlo thu an sim. Culawng silo in Lehnak hmunhma a umsun hmun (2) khal cu cankim hman dingah a remcanlo thu an sim. Tonsuhmi mipum ih zatek (51) cun Gym lehnak an nei nan hman a ngahlo thu an sim.

Apathumnak ah, University pakhat hrangih a thupibikmi cabu le thilri pawl a tulzet hrih thu an sim. Tonsuhmi tlawngta paw ih zatek (63) cun maih zirmi cathu thawn a pehparmi cabu siar ding an sambauzet thu le tlawngta zatek (25) cun sambaunak a um le umlo an theilo thu an sim. Hih dinhmun zoh in tlawngta pawl ih calai buuk an hman dan a malzetlai timi a langter. Cuhlei ah tlawngta a tamsawn cun Department Calai Buuk an neihlo thu an sim.

Kawlca le Mirangca Department lawng in Department Calai Buuk an nei. Atak ih tisinnak pawl tuah dingah thil le ri an sambau hrih thu le khaan sungih retsakmi thilri a

malzet hrih ruangah tlawngta pawl hrangah an daihcanglo timi kan hmu thei. Cuhlei ah thilri hrekkhat cu an man a khunzet hlei ah siatter pang asile liamkuan a tul ruangah tlawngta pawl in an tham ngamlo timi kan hmu thei. Ruah dingmi thil pakhat cu Department hrekkhat ah zirhtu an daihcangzet (a hlei hman an hlei lam) nan Department hrekkhat ahcun an tulsamzet lai timi a si.

Apalinak ah, tlawngta pawl ih umtlannak, motor, bike pawl retnak hmun le sumpai olsamte’n suah theinak dinhmun pawl ah a sambauzet lai timi a si. Hakha University le College pawl ah Bank a umlo hlei ah ATM cet pawl khal a umlo. Tlawngta pawl hrangah umnak hostel pawl a um nan remcangzet ih um theimi dinhmun an silo thu tlawngta zatek (70) in an sim. GTI Tlawnginn ahcun umnak hostel a umlo ruangah tlawngta pawl cu innhlangin khua an sa. Cuvek dinhmun pawl ruangah umtlannak thuhla ah an remcanglo timi kan hmu thei.

Hmuhsuahmi pawl kan funkhawm tikah Hakha University/College pawl ah fimthiamnak zirnak hrangah a tulmi inn le lo, thil le ri sambaunak a umzet lai ih tlawngta pawl umnak inn le lo an daihcanglo timi a lang. Harhdamnak le taksa damcak dingin cangvaihnak pawl hrangah lehpannak hmun le hma, thil le ri tulsamnak a um hrih timi kan hmu thei. Curuangah Hakha University/College pawl an thansosin theinak dingah le Fimnak, thiamnak pawl ro le rah ih a pektheitu University, College pawl an si theinak ding ahcun University, College ih tuanvo neitu pawl, acozah uktu pawl, zatlang pawlkom pawl le mipi nu le pa zate’n kutkai aw in tuantlang a tulzet hrih a si.

Note: Written by Tha Cer Cin, and translated by Thawng Bik

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s