Hakha University, College Penja Lam hawi Kjeaung yhm, Vawnsaichie

Tha Cer Cin

Kjeaungcha amtiu khala y, teaung ai ngai nai kjeaung yhm hawi kasabawm vawnsai napie naichie ly university harie lo pa ai naira hawi kjeaungtabie chie ai tau penja kahawi pei thai ai naira lawn ai nai kavui alylen nai ne. Chin prie theung y awm nai university hawi college chie ly kjeaung yhm, kasabawm vawnsaichie manai kamta awm moh? Nanai ly alylen nai leu ka-deing harie ne. Hunai deaungkho y vai hini research theung y Hakha university, collegechie ra y ngai nai kjeaung yhm, kasabawm vawnsai chie ly angyhm bo a? ngai rai a? angyhm y rai na baly huni ly kjeaungtabiechie ih cha amtiu ra y mana nai kamta lawn hai moh? Nanai dawn ai awm nai tla.

Hini research ra y, cha amtiu nai kha y ngai nai kjeaung hym, vawnsai, ammau naira, cha khen meingtym hawi takhra takhra aly ngai nai chie mana tengrie angyhm bo moh nanai khen nai ne. Hini ra y anui mang amtie pie nai kamta awm nai tla. Angchieh ih nai ly, Hakha y awmnai university hawi college y cha amtiu ai nai kavui ngai nai akhan (room), chabawi (tables) hawi atehra chie ly angyhm nanai niu nai ne. Hini research ih kavui deing nai kjeaungtabie bawibawi theung ih 78% my ly cha amtiu ai nai akhan (classrooms) alawn nanai hawi 75% my ly chabawi (tables) hawi atehra chie alawn nanai pathang nai tla. Na iy py, tlam khaw y nai (disables) kjeaungtabie chie ih kavui chei, vawi, lam tako ai nai kavui ly ati py sa pie nai by y nanai pathang nai ne. 
Pa-nyh ih nai ly, kjeaungtabie chie ammau ai nai meingtym nga nanai niu nai tla. Hini research ih kavui deing nai kjeaungtabie 79% my pathang naisai ly kjeaungtabie chie ih kavui ammau ai nai meingtym by y nanai tla. Hunai khyh chang y, ammau ai nai meingtym 2 rie khai pie teu iy py, neingtleih rie teaung ai nai hawi y nanai tla. 51% my pathang nail y kjeaungtabie chie ih kavui tlang ka-pu (gym) ammau ai nai meingtym khai pie teu iy py teaung ai ngo y napie.
Pa-thom ih nai ly, university harie y alylen keh nai cha-iu hawi vawnsaichie anga y nai ne. Hini research ih kavui deing nai kjeaungtabie 63% my pathang nai ly, amy amtiu nai subject hawi amtawm nai phain ai nai cha-iu akyh y rai, nanai hawi 25% my ly kjeaungtabie chie ly mymychie ngai nai cha-iu chie ly atichie moh nanai py pany y nanai pathang nai tla. Huni ai khen ai nabaly kjeaungtabiechie ly cha khen meingtym (library) teaung nai di parai nanai niu nai tla. Hunai khyh chang y, kjeaungtabie phyrie chie ly cha khen meingtym (library) by y nanai py pathang law nai tla. Myanmarcha hawi Englishcha departmentchie naini cha khen meingtym (library) awm ih, kalang takhra departmentchie ly by y; hunai khyh chang y, practical sa ai nai kavui vawnsai chie maten py by y nanai pathang nai ne. Vawnsai phyrie chie ly vangteing parai ih phra vui law baly pe teang tla ai napie nai hawi pajeih nai lawn sui h kjeaungtabiechie ly teaung vam y nai ne. Vai harie ly, department phyrie ra y, sara alawn teu iy py, department phyrie ra y ly sara alawn y naichie awm nai ne.
Palyh ih nai ly, kjeaungtabie chie chei vawi mawtawka, saike khai ai nai meingtym, awm ai nai meingtym, kjeaung kampawm theung y my pasa khai ra leaungsai (bank system) chie ngai nai tla nanai pathang u nai ne. Hakha university college y pasa khaira meingtym (bank) py by y nai kamta ATM chau py by y nai ne. Hakha college kampawm theung y kjeaungtabiechie awm ai nai hostel awm teu ly awm ai naisai rai parai nanai 70% my pathang nai ne. GTI ly kjeaungtabiechie awm ai nai hostel py by y ih, mymychie my mary theung y awmra yhm alai iy awm ai nai tla ti. Hunai deaungkho y, Hakha y kjeaung lyhn nai kamlo mang ih kjeaungtabie chie ly raira avum nai ne.
Hunai deaungkho y, hini research ih deingdai niu nai ly, Hakha y awm nai university hawi college chie ra y kjeaung lyhn naichie ih kavui kjeaung yhm, kasabawm vawnsai napie naichie aly a-eang nai kamta ly kjeaungtabiechie awm ai nai meingtym chie py ngai nai ne. Tlamsa ai nai hawi tlang lo pa nai kavui ammau nai meingtym hawi ateaung vawnsai chie py ngai phi nanai ne. Hunai deaungkho y, Chin prie theung y university hawi college chie lo pa ai nai kavui achora hawi mipui chie vanrie athosa ai ngai nai ne.

Note: Written by Tha Cer Cin and Translated by Mai Teresa Khin

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s