Phunsang Tlawng Fimthiamnak le Tlawngta pawl ih Zalenzet ih Hriltheinak

Cer Khengmual

Tlawngta pawl fimthiamnak an zir tikah zalenzet ih maih duhmi an hriltheinak hi a thupizetmi a si. Myanmar ram ih Education System kan zoh tikah maihduhmi cathuhla pawl zalenzet ih hriltheihnak kan nei kan tinan a takram ahcun ticawklomi harsatnak, khamnak pawl a um ruangah maih duhmi, maih ruahsanmi vekin a ra canglomi dinhmun tampi a um. Hrekkhat tlawngta pawl cu maih kai dingmi University, zirdingmi cathuhla pawl kha thuneitu (Fimthiamnak Ministry) ih khiahsak ciami an si ruangah an maih thansonak dingah dawnkhamtu an si hlei ah an duhlomi an zir rero ruangah tlingtlaknak taktak um nawnlo in a lak in can a cemral thluh timi kan hmu thei.

Thansonak tamzet a ummi lakah Phunsang Fimthiamnak Zirkhal hi pakhat a sive. Phunsang fimnak kan zir kan ti tikah tlawngca lawng silo in a dang theihkauhnak pawl khal zirzoi reronak hmun a si ruangah Phungsang Tlawnginnpi cu theihnak, thiamnak ro le rah in petu a si. Mino pawl maih duhthusamnak a ngaisa suah reronak hmun cu University a si ruangah zalenzet ih hril theinak an neih a tul. Tuini tuican tiang maih duhlomi University ah uarlomi cathuhla pawl a zir reromi tlawngta pawl an um lai. Ziangruangah hitin kan cang. Tlawngta pawl in zalenzet ih maih duhhriltheinak an ngah kan tiko nan a takram ah thuneitu pawl in an khiahsakcia thehmi a si ti kan hmu thei. Thuthimnak pakhat kan pek a sile University pakhat ah hriltheimi cathuhla (12) a um tibang sehla tlawngta pakhat dinhmun in cumi pawl lak ihsin a maih duhmi pakhat hriltheinak a nei a si. Asinan cuih dinhmun cu hriltheinak lawng a nei ih a tak ih kai le zirtheinak taktak cu a nei cuanglo. Cuih a hriltu tlawngta pawl lak ihsin thuneitu le tuanvo neitu pawl in phun (10) a onnak Mark zoh tahrat in cuih a ngahmi tlun ihsin thlir in an rak hril timi hmuh a theih. Cutikah phunhra ah mark tamzet a ngahmi tlawngta hrang ahcun hrilmi ngahtheinak cantha tamzet a nei nan phunhra ih mark malte lawng a ngahmi tlawngta hrang ahcun hriltheinak a nei nawnlo. Tlawngta pakhat ih suahkeh titheinak zir in a kai dingmi tlawng le cathuhla pawl zirter silo in a mark ngahmi tlun ah thum aw in a zir dingmi hrilsak le khiahsak a si tikah cuih tlawngta ih a kaiduhmi cathuhla le thuneitu pawl ih hrilsakmi karlak ah remcanlonak tumpi a um ringring a si. Hih dinhmun in tlawngta pawl an fimzirnak ah zalenzet ih hriltheihnak an neilo timi a langter.

Culawng silo in Myanmar ram acozah in tualsung, ramkulh/ramthen dinhmun in a naibikmi Phunsang Tlawng, a remcangbik dingmi tlawng pawl ah kaiternak le zirternak dinhmun a um rero. Chinram ihsin phunhra a ongmi tlawngta a si ahcun Kalay University, Monyua University pawl ih kaiternak, Falam le Thantlang ih tlawngta pawl cu Hakha ih kaiternak tivek in khiahciami pawl an nei. Hivek ih Khiahsaknak ruangah zalen zet ih tlawng inn le cathuhla hriltheinak an sunral hlei ah tlawngta pawl ih an thanso theinak dinhmun khal a khambet theh a si. Tahthimnak ah – Falam le Thantlang ihsin phunhra a ongmi tlawngta kha Hakha College pakhat lawngah kai theinak a nei tibang sehla, a dang tlawng pawl ah zirtheih a simi Computer, Mirangca, le zirnak dangdang a kaiduhmi tete kaithei nawnlo in a um ruangah a thanso dingzat thangso thei nawnlo in sunralnak tumpi a nei. Curuangah Phunsang Tlawng pawl ih an umnak dinhmun lo theihlo in zoh a tul thlang. Zirduhmi Cathuhla a bangaw ko nan zirnak hmun a dangawk ruangah thiamdan khal a bangaw theilo a si.

Tlawngta pawl zalenzet ih hriltheinak peknak cu sangka tampi onsak vek a si ruangah a thupizetmi a si. Tlawngta pawl ih kai duhmi University, Cathuhla hril tikah an tlin a si ahcun a dang khamnak le rikhiahnak umter nawn lo in zalenzet in an zir le an kai thei a thupi ngaingai a si. Cutin silo in Rampi acozah in a hmunhma lawng silo an zir dingmi cathuhla pawl tiang a khiahsak cia a si ahcun tlawngta pawl ih thansonak ah dawnkhamtu a si hlei ah thiamhleice tlawngta pawl an suak thei nawnlo ding. Curuangah, Fimthiamnak rianram ah hmasawn thangsosin dingin tlawngta pawl hrang ih khiahmi hruang sungah re lo in zalenzet ih hriltheinak dingah sangka tampi onsak an tul a si.

Note: Written by Cer Khengmual, and translated by Thawng Bik

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s