Tuition, Laksawngpeknak le Phunsang Fimthiamnak

Salai Ngun San Aung

Tuition timi tongfang cu Myanmar ram sungih fimzirnak tlawng pawl ih tlawngtum hnu a lenglam ih a hrantei’ zirnak kha simduhmi a si. Frontier Myanmar cun Tuition zirhnak hi Myanmar ramsung ahcun sumlut thazetmi hnatuan pakhat dinhmun in tuini tiang a um hrih thu a tarlang. Tuition zirhnak cu Myanmar ram tel in ram hrekkhat cun dan leng ih hnatuannak a si tiah an khiahmi a si. Asinan Myanmar ram sungah phungsang zirnak University pawl tiang khal ah tuition zirhnak a um rero hlei ah a cancan ah ngahduhsanmi nei in Saya le Sayama pawl hnen ih laksawngpeknak khal a um rero lai timi kan hmu thei. Cuvek in University pawl ah ziang ruangah tuition onnak le laksawng peknak pawl an um rero lai a si pei. Cumi in tlawngta pawl hrangah thathnemnak ziangtluk a pe. Asilole ziangtluk in siatnak a thlenter. A tak in thathnemnak teh a suahpi maw timi pawl hliakhlai a tul. Hih hliakhlainak in Chin mi a tam Uu kainak Kalay University kha bat tahrat in in tuition zirnak le laksawng peknak pawl ruangih phunsang tlawngta pawl ih thathnemnak, asilole siatralnak pawl zirzoi dingah tumtahnak a nei.

Hmuhsuahmi pawl cu a tanglam vek in an si –

Ahmaisa ah University ah tuition on dan dinhmun cu tlawngta pawl ih camibuai onnak hrangah an mah lala in sumpai khonkhawm aw in saya le sayama pawl an dilngennak ruangah a si timi kan hmu thei. Tonsuhmi tlawngta ih zatek (61) cun tuition kainak ihsin camibuai onnak hrangah a thathnempi hngai thu an sim ih zatek (58) khal in tlawngta pawl in tuition zirh dingah saya/sayam pawl an sawm thu an sim.

Apahnihnak ah tuition onnak, le kainak ruangah tlawngta pawl ih nuncan ziaza a siatsuah timi kan hmu thei. Tonsuhmi tlawngta ih zatek (77) cun tuition ruangah tlawngkhaan sungih cazir can a mal ih hrekkhat tuition pawl ahcun camibuai ih a ra dingmi thusuhnak pawl lawng an zirh tiah an sim. Cuihhlei ah tuition ruangah saya/ma pawl ih tlawngkhaan sungih an zirhnak an daithlansan thu tlawngta zatek (47) in an sim. Tonsuhmi tlawngta ih zatek (49) cun tuition kainak ruangah thiamhleicemi kan nei cuanglo tiah an sim. Curuangah tlawngta a tamsawn cun tuition kai cu a tha tiah an sim nan phunsang tlawng hrangah a tak ih thathnemnak a pek lo thu kan hmu.

Hmuhtonnak a dang pakhat ahcun laksawng a petu tlawngta pawl tlun ah saya/ma pawl ih mithmai tha pekcuangnak a um tiah tonsuhmi tlawngta pawl ih zatek

(62) cun an sim. Cuhlei ah camibuai ih a ra dingmi theihcia duh ruangah laksawng peknak a um timi le, laksawng pek duhlo in a elkah tu tlawngta an um khal le a duhtu an mah tlawngta lala in an hnek timi kan hmu thei. Laksawng pek lo ahcun Camibuai suntheinak a um tiah tonsuhmi ih zatek (45) cun an sim.

Asinan tlawngta a tamsawn cun laksawng peknak ruangah camibuai onnak hrangah thathnemnak a um lo thu an sim. Tlawngta a tamsawn asimi zatek (74) cun laksawng peknak cu a thami tuahnak a siko tiah an sim. Tonsuhmi tlawngta ih a hrek (zatek 32, zatek 31 cun khawnghngornak ziangvek in a um timi an fianglo thu an sim) cun laksawng peknak ruangah phunsang cazirnak ah thatlonak a thlenter ih zatek (37) cun thatlonak a suahter timi an zumlo thu an sim.

Anetnak ah thesis le term paper ngancan ahcun saya/ma pawl hnen ah laksawng pek a tul thu an sim. Cuhlei ah extra-reader ti ih kawhmi lenglam ih hliakhlainak cahran (thesis) a zohfeltu pawl hrangah suhsohnak le ei-in zate tlawngta pawl in tuahsak a tul hlei ah saya/ma pawl ih lenvah fehduhnak zate motor hlang in thlah tulmi dinhmun ih an dinthu hmuhsuak a si.

Thutlang kan khawm tikah fimthiamnak thangso dingin tuition kainak, saya/ma pawl upatnak langternak ih laksawng peknak silo in camibuai onnak le Degree Caken ngahnak hrangvial ah tuah reromi an si tiah hmuhsuak a si. Cuhlei ah tlawngta le saya pawl hrangah maih tuan dingmi tuanvo tlun ah daithlannak le nuncan ziaza, fimzirnak tiang a siatsuah thei timi a lang. Curuangah tuini ih tuah reromi tuition onnak, kainak le laksawng peknak pawl cu thuneitu pawl ihsin thok fimnak a zirtu tlawngta pawl, le saya/ma pawl in mai ram le miphun duhdawtnak thawn dokalh Khambetnak neih ding a tulzet a si.

Note: Written by Salai Ngun San Aung and translated by Thawng Bik

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s