Lokhawhna Sang (Lungpi) ah Tintan Kahte Tuahkhak Haksatna, Buaina leh Seploh a Phamawh Thute

Mary Kipmen

Hih thu kankhiatna pen Zogam, Falam gamhuam a om lokawhna tawh kisai sang (Lungpi) ah sang naupang te tuahkhak haksatna, buaina leh seploh aphamawh thute kankhiat ding ngimna ahi hi. Hih kankhiatna ah Qualitative Approach kizang in sia/mah te a kihel mimal 20 te kiangah a mi mahmah tawh kimu tuahna tawh ahi zong, phone tawh ahi zong dotna kinei hi. Hih kankhiatna ah anuai ateng kimu thei hi.

Khatna ah lokhawhna sang (Lungpi) ah sangkah sang naupangte omna khawlna ah a haksatna uh kimu hi.  Sang naupangte giah nading inn (hostel) a kicin loh banah lupna zong kicing lo ahih manin mi khat lupna te nih gawmin mi thum lumkhawm uh ahihna kimu hi. Lupna khat leh khat kikal zong kuacik lua ahih manin van koih nading haksa in mihing pai nading zong alem lohna kimu hi. Khan (room) khat leh khan khat ki-um siset (inndei) cih bang omlo ahih manin sepnop khat peuh zong suakta takin a kisep theih loh banah lai et nadingin zong alemlohna ciang khat a omna kimu hi.

            Nihna ah neklehdawn tawh kisai haksatna om hi cih kimu hi. Nikhat in 2 vei bek an kipia a, kal khat in sameh 3 vei akipiakna kimu hi. A mi mahmah tawh kimu tuah in a kidong sang naupang atam zaw ten nisim phialin kalabe leh ngapik bekbek ne uh ahih manin baih asak loh dan uh leh neklehdawn tawh kisai haksa asaknate uh thum ngaungau uh hi. Tua banah an nekna khan (dining room) zong kuacik ahih manin sabuai leh tutphah kicing lo a, akhen khen in an anekna uh kimu hi. Nitak annek khit ciang kum nihna leh kum thumna sang naupangte lo (field) pai kul ahih manin nawhsa takin an anek na uh leh an zong kinekpih baih lua ahih manin zan in lai asim uh ciang agil uh akial thethuna ahaksatnate uh kimu hi. Nitak an a kinekpih baih luatna hangin zan lai et ciang agil uh kial thei pahpah uh ahih manin suakta takin ane adawn nuam sang naupangte sang pualam ah a omna uh sang naupang pawlkhat ten ong dawng uh hi.

Zuih ding thute (discipline) khauh lua ahih manin haksatna omhi cih kimu hi. Sang huang sungah cycle sungtum pusuah phal lo, sang huang pan a pusuah simun suaikai kha den leh numei te nitak 5:30 PM asat nak leh pusuak theilo uh ahih manin haksa asakna uh kimu hi. Gentehna, sia/mah te bekbek in gen in khatlehkhat kikuptuahna cih dan aom lohna kimu hi. Sang laibupi (text book) khempeuh pen manglai tawh aki at hi a, sia/mah ten akam uh tawh lehsak (translate) in nasep (assignment) apiak uh ciangin amau ciaptehsak (note) tengmah panin a at kik (copy) ahihna uh kimu hi. Lai ahuan ding uh ciang zong lotngah (by heart) sim uh ahih manin sang naupang te adingin a haksatna (challenge) uh kimu hi.

A lai bek tawh sinna sangin sem (practice) leng kisiam zaw hi napi’n sepna tawm hi ci-in sang naupang pawl khat ten gen uh hi. Gentehna in singhiang zop dan pen alai tawh kisin bilbel a, a taktak in sinna (practice) omlo hi ci uh hi. Tua banah lai sinna khan khat sungah mimal 75 bang om ahih manin sabuai, tutphah kicing lo ahih manin tutna khat ah mi 2 tut loh phamawh dinmun ah om ahihna uh kimu hi. A tam zaw ah singno suan dan bek kisin sak ahih manin paak suan dan a uk te adingin asiam nading uh haksa mahmah ahihna kimu hi. Tua banah sang ah khaicii a kicing in a om lohna kimu hi. Nasep nading in van kicing lo in tupeek bek azatna uh kimu hi. “A tatak in asep khak ngei loh uh nate sang laibupi sungah a sinna uh” sang naupang a tamzaw ten ka dotna uh hong dawng uh hi.

Tua banah paulehham ah haksatna om ahihna kimu hi. Lai hilh sia/mah te pen kawl te vive ahih manun chin sang naupang te adingin a lai hilhna uh telhak sa uh hi cih kimu thei hi. “Lai pawl khat te bang a kammal zatte uh ka telloh uh hangin ka dong kik ngam kei uh hi” ci-in sang naupang khat in gen hi. Adang muhna khat ah sang naupang atam zaw te pen amau lunggulhna omlo pi in anu apa, meltheih ulehnau te’ sawlna tawh akah uh ahih manun a laisin uh lunglut lo uh hi. Tua bangte pawl pen a sinsak sia/mah te adingin a haksatna (challenge) khat ahihna kimu thei hi.

A tawpna ah hih lokhawhna sang (lungpi) ah sang naupang te pen neklehdawn, zuih ding thu (discipline), lai kihilh dan, sepna tawh sinna (practical) thanemna, sangsung vatzat kicinlohna, khaicii kisapna leh paulehham haksatnate phukha uh ahihna kimu thei hi.

Note: Written by May Kipmen, and translated by Langh Sian Khai

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s