(Tekahto) pyinya mong lah cong htu/cong hta gui-ah, ng’ya hlü ghü-ah, a mi ma lam m’kon

Cer Khengmual

Cong htu/cong hta gui, pyinya a mi ng’thei tham yang, a mi mät ta yum (Tekahto) gui cuh, a mi m’lung ngai-ah lo hlei, a mi ghü vai cuh, a tung pi-ah hlü ca kya ki. Myanmar ghun khaw pyinya mong lam (education system) cuh teng shum ma kya kung, mät nawh yum-ah a mong (pa-hta) cuh ng’ya hlü-ah ghü neh ga ce, pyein hnging te cun va, a cang nga läi hmong cang nak gui , ngai-ah kä kya nak gui cuh, om ca kya hlei, mät ta yum , mät ta äp-ah, kä kya nak phih, om shan ca kya ki nei. Cong htu/cong hta m’sha gui cuh, a mi kai vai (Tekahto), a mi ng’thei vai a mong (pa-hta) gui cuh, ang ng’vai gui (Pyinyaei von gyi hngün) nawh, ang m’khän peit pi vai hlü-ah kya hlei, nga mi, a mi  hang kai nak vai lam , k’bing vai hlü-ah Kya kon na mä, a  mi mät ta yum-ah a mong (pa-hta) gui a ming ng’thei-ah kä kya hlei, I kä hngu hmat,  a khaw lä düt-ah, khaw kum mai tu düt ci phih hngu-ah kya ki.

       Hang hlüng tai nak vai lam, ak da gui-ung ka, (Tekahto) cong kai cuh, lam tu mat-ah kya ki. (tekahto)Cong-ngung, ca ng’thei tu hlu-ah, a hngei hngei hngu hmat nak gui phih, ga nak ka kya neh (Tekahto) Cong Im nu cuh chang k’da ka vai, hngu hmat vai thei gui ga tang nak ka, m’kon ta kya ki. K’hmo tho gui-ah, a mi ng’mang k’phlan m’kom ta kya hlei, a ming ng’ya hlü-ah, a mi om vai, hlü ca kya ki. Tu chü chüt, mät ta kä yum-ah a mong (pa-hta) gui, (tekaho)-yung ng’thei tham tu ca cong htu/ cong hta gui, om ba ca phih kya ki. I kya hlei ang? Cong htu/Cong hta gui-am, a mi yum-ah a mong (pa-hta), a mi ghü vai ce, pyein nak om te ki phih, a cang nga ng’vai gui-ah, m’khän pi gui cuh hngu hnging nga kya ki. E.g (Tekahto) tu mat-ung, ghü vai a mong (pa-hta) (12) a om-ung, Cong hta tu mat ta phäh, cuh cun na a mong gui-ung ka, a mät ta yum tu ba ghü hnging ca kya ki. Cun te phih, ghü vai bäng om neh, kai vai, ng’thei vai kä om phak ca kya ki. (setan) ca min poi-yung, a hmat ga-ah ci-ah va, ng’vai gui nawh I kai vai? I ng’thei vai? Cuh a mi ghü-ah kya ki. Ca kya hlei (Setan) cuh, a tung pi-ah, kya lo ne, a hmat a däm ga ca  Cong htu/ Cong hta gui phäh, lam ni tu ba neh, kyen ki gui phäh cuh, a mi yum-ah (Tekhto), a mong (pa-hta) gui cuh, a mi ghü vai kä om ca kya lo ki. Cong htu/ Cong hta gui ah hngu hmat tu cang kä teng neh, a mi ga hmat bäng teng neh (pa-hta) a mong cuh ghü pek ki gui kya hlei, ng’thei hlü-ah a mong (pa-hta) lah ng’vai gui-ah ghü (pa-hta) a mong cuh kä ng’chum ca, hngu nak om ca kya ki nei.

Cun kon na, Myanmar ghun khaw yung, a-coyah nawh, ang en nak tu ba-ah (Tekahto), ng’hloi tu ba ca (tekahto) gui-yung, Cong htu/Cong hta gui cuh, a mi kai hlak gui vai hlü phih kya ca kya ki nei. K’cho khaw-ung (Setan) phlän ca cong htu/Cong hta gui kya kung,  Kalay (Tekahto), Monywa(tekahto)-ung kai hlak gui ni, Falam mong go, Thantalang mong go gui-ung ka, kya kung,  Hakha College kung kai hlak gui cuh-ah ngu-ah kya ki. Cun na ci gui cuh, kai hlü-ah (Tekahto), yum mah a mong (pa-hta) ng’thei cuh kä om ca kya neh, Cong htu/Cong hta gui-ah a mi bä tu nak vai phäh, lam k’bing nga mäi vai hlü-ah kya ki. E.g: Falam mang go lahThantalang mang go yung ka nawh (Setan) phlän ca, conghtu/Cong hta gui cuh, Hakha College bäng ngung, a mi kai tu hnging nga kya kung, A hngei (Tekahto) gui yung, a mi m’thei-ah computer, English, a hngei hngei kai vai gui, a om long kya kung, kä ng’hloi ca hlei, Cong htu/Cong hta gui-ah hlüng tai nak cuh, m’di peit ta kya ki.

Cong htu/Cong hta gui-am, a mi mät ta yum, a mi kai vai, a mi ghü vai, peit cuh m’kon hmon peit ton täng hlei, a tung pi-ah hlü ca kya ki.  Cong htu/Cong hta gui-am, a mi kai hlü-ah (Tekahto), a mong (pa-hta) ung, a mi m’chüt ta kya Kung, kä hmong cang ngei pe neh, a mi ng’ya hlü-ah, a mi kai, ng’thei tham tu vai hlü ca kya ki. Cun-ah kä kya hlei, ghun khaw a-coyah nawh (tekahto) ni, a ming ng’thei vai a mong (pa-hta) gui cuh, a m’khän peit gui ge-ah kya kung , Cong htu/Cong hta gui-ah,  a mi hang hlüng tai vai nak lam,  k’bing peit gui vai hlü kya hlei, hngu hmat chang, Cong htu/Cong hta gui, om long khai-ah kä kya ca kya ki. Cun nak kya hlei, pyinya on, hlüng tai nak vai phäh-ah, Cong htu/Cong hta gui –am, lam m’kon hmon peit vai cuh, a kya hlü ca kya ki nei.

Note: Written by Cer Khengmual, and translated by Joseph Ning Thang Ki

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s