Tuition m’thei, let song peit lah Hlüng tai Ca Pyinya-ah mong

Salai Ngun San Aung

Tuition na ng’ming cuh, Myanmar ghun khaw-ung, Cong Im kyong, Ca ng’thei kon na, a pung nga, ng’thei na tu hnga ce, pyein hlü ah kya ki. Frontier Myanmar nawh Myanmar ghun khaw-ung, tuition m’thei cuh tu chü chüit, ngui shui nak, ni ca lam tu mat ce, pyein ki nei. Tuition m’thei cuh Myanmar ghun khaw lah ghun khaw, ak da nawh, kä bi vai ce, a mi pyein na kya ki. Cun te phih, Myanmar ghun khaw-ung, hlüng tai pyinya ng’thei nak hngo-yung, tuition om ci, cuh bäng, kä kya hlei, a hmät I bo ng’yang hlü neh, Sayar/Sayarma gui-am, let song peit nak phih, om ca kya ki. Ca Kya hlei, (Tekahto) ung, I kya hlei, tuition m’thei, let song peit a om? Cun gui cuh Cong htu/Cong hta gui phäh, I-ah a ni or I- ah a sheit? a cang nga bä ki ang? Ce teng m’kyein vai, hlü ca kya ki. Shin na (htu-tei-htana) nawh, K’cho chang gui, a da a mi kai nak tu ah Kalay(Tekahto) cuh, teng neh tuition m’thei lah let song peit tung , Cong htu/Cong hta gui hlüng tai pyinya ng’thei nak-ung, I ang a ni or hngo cha-ang, a sheit- gui cuh teng shum vai ng’nga tü-ah kya ki.

Shui lei hngu hmat gui cuh, shin na mi hmat khai kya ki; ma pi mät neh (Tekahto) – ung, tuition m’thei cuh, Cong htu/Cong hta gui nawh (Ca-min-poi), a mi aung vai ngui lok neh sayar/sayarma gui, ca m’thei khai a mi chüt cuh, hngu-ah kya ki.Cong htu/Cong hta (61%) nawh tuition kai cuh, (Ca-min-poi) aung vai phäh ce pyein neh, Cong htu/Cong hta (58%) nawh na m’thei tu gui khai sayar/sayarma chü cuh, om ki ci neh, pyein ki gui kya ki.

A hngi nak-ung, tuition m’thei, tuition kai-ah phäh-ah, Cong htu/Cong hta gui cuh kä tha nak hma cuh hngu-ah kya ki. Cong htu/Cong hta (77%) nawh tuition kai-ah phäh, Cong Im kyong nga ng’thei tham nak cuh a kyen lo ni, m’sha tuition-ung (Ca-mon-poi) yung lo kai bäng ng’thei nak om ki cuh hngu hmat ta kya ki. Cun kon na, tuition ng’thei nak, om ca kya hlei, sayar/sayarma gui cuh, Cong nga, kä a mi m’thei nak gui phih om ci ce, conghtu/Cong hta (47%) nawh pyein ci gui kya ki. Cong htu/Cong hta (49%) nawh pyein neh, tuition kai-ah phäh, I k’te-ah phih kä hmat lo kyäm, ca kya hlei, Cong htu/Cong hta a da tu ba nawh läi, tuition kai cuh ni te ki va, a cang nga hngu hmat nak, a hang hlüng tai nak vai läi, kä kya ki ce, hngu hmat nak phih om ca kya ki.

A hngei hngu hmat cuh, let song pe shan ca Cong htu/Cong hta gui cuh Sayar/Sayarma gui nawh a mi yeinak tu ba om ki ce, Cong htu/Cong hta (62%) nawh pyein ca kya ki. Cun kon na, (Ca-min-poi) yung, a mi ng’shi vai gui cuh hmat hlü u neh, Cong Im kyong om, van nawh sayar/Sayarma gui-am, let song peit nak, maa-yung phih, ling neh peit nak gui cuh hngu hmat ta kya ki. Cong htu/Cong hta (45%) nawh sayar/sayarma gui-am, let song kä peit-ung (Ca-min-poi) kä-aung nak hnging phih om ci ce, pyein nak, om ca kya ki.

Cun te phih, cong htu/cong hta, a da tu ba nawh, let song peit cuh (Ca-min-poi) aung vai phäh, a khaw lä nei ce, pyein ci gui kya ki. Cong htu/Cong hta (74%) nawh let song peit cu k’bi ni-ah kya ki ce, pyein nak gui phih, hngu, hmat nak phih, om ca kya ki. Ng’shi ca nak-ung, Cong htu/Cong hta (32%), (31%) nawh, let song peit nak cuh (tekahto) pyinya ng’thei na kung, käng’hloi ki ce, pyein u neh, (37%) naw lä, ni ca hngu teng nak-ah mong cuh hmat tu kya ki nei.

A hngu pi-ah pyein na kya kung, Thesis lah Term paper guk then ya yung, sayar/sayarma gui-am, let song peit vai, hlü ki ce hngu nak, om ca kya ki. Cun kon na, extra-reader ce, chü-ah a pung nga ka nawh thesis cuh, teng neh ghü khai gui-am, a mi i om nak vai lah a mi ei awk vai van cuh Conghtu/Conghta gui nawh, ngui a mi peit kon na mä, Sayar/Sayarma gui, a mi te ton, ng’hle nak hlü päng nga, motor car ng’van neh, a kha püi nak gui phih, om ca, hngu hmat ta kya ki nei.

A toi-ah pyein na kya kung, pyinya mong, a hang hlüng tai vai phäh-ah, tuition ng’thei, sayar/sayarma gui-ah khan na, I bo nu-ah  ngai tu gui neh, let song peit ta, kä kya hlei, a lang nga (Ca-min-poi) aung vai lah poih Degree ga vai phäh-ah va, bi lo kya ki cuh hngu hmat ta kya ki. Cun kon na, Sayar/Sayarma gui lah Cong htu/Cong hta gui, a mi bi lo vai gui mong, tha-na vai gui mong lam cuh m’di peit gui-ah mäih lo hlei, tuition ng’thei, let song peit bi lo nak gui cuh ng’vai chang gui, sayar/Sayarma gui lah Cong htu/Cong hta gui van nawh, mät ta khaw chang yum hngi nak-on, ca hlo bi lo gui cuh maih khai m’di vai hlü ca kya ki nei.

Note: Written by Salai Ngun San Aung, and translated by Joseph Ning Thang Ki

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s